Kandidati i Lidhjes Demokratike të Kosovës për Vushtrrinë, Xhafer Tahiri, njëherësh edhe kryetar i kësaj komune, i ftuar në Edicionin Special është shprehur optimist që Lidhja Demokratike e Kosovës do të fitojë në të gjitha komunat që është në garën e 14 nëntorit.

“LDK-ja do të fitojë në gjitha komunat që është në garë”, ka thënë Tahiri.

Ai është shprehur i kënaqur me mbështetjen e qytetarëve në vazhdimin e rrugëtimit që e kanë filluar.

“Unë jam i kënaqur me mbështetjen e jashtëzakonshme përtej vijave partiake, jam shumë i kënaqur me përkrahjen që po e marrim çdo ditë nga qytetarët e Vushtrrisë. Unë pres që bashkë me qytetarët e Vushtrrisë ta vazhdojmë rrugën që e kemi filluar katër vjet më parë”, ka vazhduar Tahiri.

Kur është pyetur se a do të ketë koalicion me Vetëvendosjen ai ka thënë se e respektojnë vendimin e kësaj partie për të mbajtur qëndrim neutral.

“Vetëvendosja ka marrë vendim që të jetë neutral në këto zgjedhje, çka e respektoj. Kemi qenë të parët që kemi ndërtu ndonjëherë koalicion mes LDK-së dhe VV-së në vitin 2017, i kishim vënë synim vetës që modeli i qeverisjes në Vushtrri të jetë qeverisja e nivelit nacional. Gjë të cilën e kemi arritur”, ka thënë ai.